Ֆրանսիացի բժիշկները՝ առաքելությամբ Հայաստանում

Տնտեսական, մարդասիրական և բժշկական համագործակցության առաքելության շրջանակում, Santé Arménie-ի և Ֆրանս-Հայկական Առևտրի և Արդյունաբերության Պալատի (#CCIFA) համագործակցությամբ, Ֆրանսիայից ժամանած բժիշկների մի խումբ հինգ օր անցկացրեց Հայաստանում՝ վերապատրաստելով և փորձի փոխանակում իրականացնելով իրենց հայ գործընկերների հետ Գորիս և Երևան քաղաքներում։ Այս նախաձեռնության նպատակն է ամրապնդել տեղական բժշկական կարողությունները, մասնավորապես՝ կանխարգելիչ բժշկության ոլորտում։

Առաքելության կարևոր պահերից մեկը ջերմ և կառուցողական հանդիպումն էր Հայաստանում Ֆրանսիայի Հանրապետության արտակարգ և լիազոր դեսպան, Նորին Գերազանցություն պարոն Օլիվիե Դըկոտինիի հետ։ Հանդիպման ընթացքում դեսպանը նշեց, որ ուրախ և պատիվ ունի ընդունելու ֆրանսիացի բժիշկներին։ Նա ընդգծեց նման մարդկային և մասնագիտական գործընկերությունների կարևորությունը, որոնք մարմնավորում են Ֆրանսիայի և Հայաստանի միջև գոյություն ունեցող խոր և ամուր կապերը։

Իրենց վկայություններում մասնագետները շեշտել են կանխարգելման կարևորությունը դեռևս ծննդից սկսած, մարդու օրգանիզմի ճիշտ ընկալումը և բուժաշխատող–պացիենտ–ծնող իրական հարաբերության ձևավորումը։ «Անհրաժեշտ է ներգրավել ծնողներին և աջակցել նրանց, հատկապես մայրերին, որոնք հաճախ բախվում են դեպրեսիայի խնդիրների», — նշել է բժիշկներից մեկը։

Գիտելիքների և փորձի այս փոխանակումը բոլոր մասնակիցների կողմից ընկալվել է որպես փոխադարձաբար հարստացնող փորձառություն։ «Մենք ընդունեցինք իրավիճակը այնպես, ինչպես այն կա՝ առանց դատողությունների, և ստեղծեցինք հսկայական մարդկային կապ։ Սա խորապես ուսուցողական փորձառություն է երկու կողմերի համար», — հավելել է մասնակիցներից մեկը։ Չնայած առկա մարտահրավերներին՝ մասնագետները շարունակում են լավատես մնալ. «Մենք անում ենք հնարավոր ամեն ինչ, նույնիսկ երբ թվում է, թե դա անհնար է»։

Այսպիսի առաքելությունները մարմնավորում են բարեհամբույր և երկարաժամկետ համագործակցություն, որտեղ մասնագիտական փորձը միահյուսվում է ուշադրության և լսելու պատրաստակամության հետ, իսկ գործողությունների հիմքում ընկած է մարդկային կարեկցանքը։

Հատուկ շնորհակալություն բժիշկ Ռոժե Վասյորին (մանուկների և փոքր երեխաների ֆունկցիոնալ վերականգնման և ռեաբիլիտացիայի մասնագետ), ինչպես նաև ֆիզիոթերապևտներ Բլանդին Ռուբոյին, Ստեֆանի Մարիոնին և Գայանե Մնացականյանին։