ՀՀ էկոնոմիկայի նախարարի տեղակալը Ֆրանսիայում մասնակցել է «Սյունիք–Օվերն-Ռոն-Ալպեր–Հայաստան բարեկամության օրվան»
Նորություններ
2024 թվականի նոյեմբերի 28-ին Հայաստանի Հանրապետության էկոնոմիկայի նախարարի տեղակալ Արման Խոջոյանը մասնակցել է Ֆրանսիայի Լիոն քաղաքում անցկացված «Օվերն-Ռոն-Ալպեր–Հայաստան–Սյունիք բարեկամության օր» միջոցառմանը։ Այն համախմբել է քաղաքական գործիչների, տնտեսագիտական փորձագետների և երկու տարածաշրջանների ներկայացուցիչների՝ քննարկելու Հայաստանի և Ֆրանսիայի, մասնավորապես Սյունիքի մարզի և Օվերն-Ռոն-Ալպեր տարածաշրջանի միջև երկկողմ համագործակցության և տնտեսական զարգացման հնարավորությունները։
Քննարկվել են մի շարք կարևոր հարցեր, այդ թվում՝ տնտեսական համագործակցության ընդլայնումը և Սյունիքի յոթ համայնքների ու Օվերն-Ռոն-Ալպեր տարածաշրջանի քաղաքների միջև քույր քաղաքների համագործակցության ցանցի ստեղծումը։ Միջոցառումը նպաստել է երկու տարածաշրջանների միջև կապերի ամրապնդմանը «Մեկ քաղաք, մեկ համագործակցություն» նախաձեռնության շրջանակում, որի նպատակն է ձևավորել երկարաժամկետ գործընկերություններ տեղական ինքնակառավարման մարմինների միջև։
Այցի ընթացքում Արման Խոջոյանը ելույթ է ունեցել համագործակցության տնտեսական բաղադրիչին նվիրված նիստում՝ ներկայացնելով Հայաստանի տնտեսական միջավայրը և զարգացման առաջնահերթությունները։ Նա անդրադարձել է Հայաստանի, մասնավորապես Սյունիքի մարզի առջև ծառացած տնտեսական մարտահրավերներին և ընդգծել Օվերն-Ռոն-Ալպեր տարածաշրջանի հետ համագործակցության կարևորությունը՝ դրանց հաղթահարման գործում։ Նա նաև նշել է, որ այս համագործակցությունը մեծ ներուժ ունի երկու տարածաշրջաններում ներդրումների խթանման և նորարարությունների զարգացման համար։
Միջոցառման ավարտին Սյունիքի մարզի յոթ համայնքները համագործակցության հուշագրեր են ստորագրել Օվերն-Ռոն-Ալպեր տարածաշրջանի իրենց քույր քաղաքների հետ՝ կարևոր փուլ նշանավորելով երկկողմ հարաբերությունների զարգացման գործում։ Արման Խոջոյանը նաև հանդիպել է Օվերն-Ռոն-Ալպեր տարածաշրջանի նախագահ Ֆաբրիս Պաննկուկի (Fabrice Pannekoucke) և տարածաշրջանի ներկայացուցիչ Լորան Վոկիեի (Laurent Wauquiez) հետ՝ քննարկելու հետագա համագործակցության հեռանկարներն ու փոխադարձ հետաքրքրություն ներկայացնող ուղղությունները։
