Ֆրանսիա-Հայաստան ֆորում. ամրապնդված գործընկերություն և ՖՀԱՊՊ-ի նոր մասնաճյուղ

Հինգշաբթի՝ հոկտեմբերի 1-ին, Լիոնի Ռեգիոնալ խորհրդի նստավայրում (Hôtel de Région) տեղի ունեցավ Օվերն-Ռոն-Ալպ – Հայաստան 2-րդ տնտեսական հանդիպումը, որը համատեղ կազմակերպվել էր Օվերն-Ռոն-Ալպ ռեգիոնի և Ֆրանս-հայկական առևտրաարդյունաբերական պալատի (CCIFA / ՖՀԱՊՊ) կողմից: Այս տարի ագրոպարենային և ագրոտուրիզմի ռազմավարական ոլորտներին նվիրված սույն խոշոր միջոցառումը համախմբել էր ֆրանսիացի և հայ մոտ 230 տնտեսական, ինստիտուցիոնալ և հյուպատոսական ներկայացուցիչների՝ մեկ ընդհանուր նպատակի շուրջ. արագացնել տնտեսական համագործակցությունը և կյանքի կոչել երկու տարածաշրջանների միջև գործարար նոր հնարավորությունները:

Ամուր և տևական տարածաշրջանային համագործակցություն

Օվերն-Ռոն-Ալպ ռեգիոնը և Հայաստանը պահպանում են պատմական, մարդկային և մշակութային խոր կապեր, որոնք ամրապնդվում են Եվրոպայի ամենաակտիվ հայկական համայնքներից մեկի շնորհիվ: 2023 թվականից ի վեր այս գործընկերությունն ավելի է ինտենսիվացել՝ հատուկ ուշադրություն դարձնելով Սյունիքի մարզին հետևյալ հինգ առաջնահերթ ուղղություններով՝ առողջապահություն, գյուղատնտեսություն, մասնագիտական ուսուցում, զբոսաշրջություն և ֆրանկոֆոնիա:

2024 թվականի նոյեմբերին էներգետիկայի ոլորտին նվիրված տնտեսական առաջին հանդիպումից և 2025 թվականի հունիսին Օվերն-Ռոն-Ալպ ռեգիոնի նախագահ Ֆաբրիս Պանեկուկի՝ Հայաստան կատարած առաքելությունից հետո, այս 2-րդ թողարկումն եկավ վերահաստատելու տնտեսական փոխանակումները կառուցվածքավորելու և երկարաժամկետ հիմքերի վրա դնելու համատեղ կամքը:

Ագրոպարեն և ագրոտուրիզմ. բարձր որակի և փոխլրացնող ոլորտներ

Առավոտյան նիստը բացվեց Օվերն-Ռոն-Ալպ ռեգիոնի նախագահ պարոն Ֆաբրիս Պանեկուկի և ՀՀ էկոնոմիկայի նախարարի տեղակալ պարոն Արման Խոջոյանի պաշտոնական ելույթներով՝ Ռեգիոնալ խորհրդի միջազգային հարաբերությունների գծով փոխնախագահ պարոն Ֆիլիպ Մենիեի մասնակցությամբ:

Միջոցառումը շարունակվեց «Auvergne-Rhône-Alpes Entreprises»-ի և «Enterprise Armenia»-ի կողմից ներկայացված տարածաշրջանային և ազգային տնտեսական դինամիկայի զուգահեռ ներկայացմամբ, ինչը մասնակից ընկերություններին տվեց ներդրումային և արտահանման հնարավորությունների հստակ տեսլական:

Քննարկումներն ընթացան երկու թեմատիկ կլոր սեղանների շուրջ.

• Ագրոպարենային փոխանակումներ. արտահանել, ներմուծել, ներդնել և նորարարել

Ոլորտի մասնագետների և ինստիտուցիոնալ ներկայացուցիչների մասնակցությամբ ընթացող այս քննարկումը (որը վարում էր նաև Ռեգիոնալ խորհրդական և «Auvergne-Rhône-Alpes Gourmand»-ի նախագահ պարոն Ժերեմի Տիենը) կենտրոնացավ արժեշղթայի ամբողջական ընթացքի վրա՝ վերամշակումից, փաթեթավորումից մինչև շուկաներ մուտք գործելը՝ բացահայտելով կոնկրետ համադրություններ տարածաշրջանային փորձառության և հայկական արտադրանքի միջև:

• Ագրոտուրիզմ և գյուղական տարածքների արժևորում

Այս երկրորդ կարևոր հատվածը լուսարձակի տակ առավ գյուղական տարածքների գրավչության խթանները և կիսվեց հաջողված փորձով, ինչպիսին է 2020 թվականից «Comité Vin Auvergne-Rhône-Alpes»-ի հետ մեկնարկած գործընկերությունը՝ ուղղված հայկական գինեգործության ոլորտի կառուցվածքավորմանն ու գինու տուրիզմի (էնոտուրիզմի) զարգացմանը:

Պատմական հանգրվան. ՖՀԱՊՊ Լիոնի մասնաճյուղի պաշտոնական մեկնարկը

Օրը նաև պատմական նշանակություն ունեցավ պալատի ցանցի համար՝ Ֆրանս-հայկական առևտրաարդյունաբերական պալատի Լիոնի մասնաճյուղի պաշտոնական բացմամբ, որին ներկա էին ՖՀԱՊՊ նախագահ պարոն Արմեն Մնացականյանը և Լիոնի մասնաճյուղի նախագահ պարոն Ռաֆֆի Դերդերյանը:

Հիմնադրված լինելով 1992 թվականին Մարսելում՝ ՖՀԱՊՊ-ն ռազմավարական կարևոր քայլ է կատարում՝ հաստատվելով Ֆրանսիայի երկրորդ տնտեսական ռեգիոնի սրտում: Այս նոր գրասենյակը թույլ կտա տեղում աջակցել տարածաշրջանային ընկերություններին արտահանման, ներդրումների և Հայաստանում գործունեություն ծավալելու հարցերում՝ միաժամանակ ամրապնդելով ֆրանս-հայկական տնտեսական դերակատարների ցանցը:

Բացառիկ դիվանագիտական ներգրավվածություն և ապագայի հեռանկարներ

Հանդիպման եզրափակիչ ելույթներով հանդես եկան բարձրաստիճան ինստիտուցիոնալ և դիվանագիտական դեմքեր.

• Ն.Գ. պարոն Ֆլորիան Էսկուդիե՝ Հայաստանում Ֆրանսիայի դեսպան,
• Ն.Գ. պարոն Արման Խաչատրյան՝ Ֆրանսիայում Հայաստանի Հանրապետության դեսպան,
• Պարոն Լորան Վոկիե՝ Ազգային ժողովի պատգամավոր, Ռեգիոնի հատուկ նախագահ, Ազգային ժողովի Ֆրանսիա-Հայաստան պատգամավորական բարեկամության խմբի նախագահ:

Բոլոր բանախոսները բարձր գնահատեցին աշխատանքների որակը և վերահաստատեցին այս հանդիպման արդյունքներին կոնկրետ ընթացք տալու հավաքական կամքը: Սկիզբ առած դինամիկան առաջիկա ամիսներին կշարունակվի թիրախային տնտեսական առաքելությունների, ինչպես նաև միջազգային նշանակության տարածաշրջանային խոշոր ցուցահանդեսներին հայկական կողմի մասնակցության միջոցով, ինչպիսիք են SIRHA Lyon-ը և Կլերմոն-Ֆերանում կայանալիք Sommet de l’Élevage-ը:

Ջերմ մթնոլորտ և շփումներ

Արդյունավետ հանդիպումը եզրափակելու համար մասնակիցները համախմբվեցին Օվերն-Ռոն-Ալպի ավանդական արտադրանքները ներկայացնող հյուրասիրության շուրջ, որն ուղեկցվում էր շեֆ-խոհարար Ալեն Ալեքսանյանի կողմից կազմակերպված հայկական բրենդիի շնորհանդեսով: Այս ջերմ պահը գործարարներին, որոշում կայացնողներին և հյուրերին հնարավորություն տվեց շարունակել քննարկումները և ուրվագծել ապագա գործընկերությունները:

ՖՀԱՊՊ Լիոնի թիմը պատրաստակամորեն ձեր տրամադրության տակ է՝ աջակցելու ձեր զարգացման ծրագրերին և դեպի Հայաստան ուղղված նախաձեռնություններին: