Համաշխարհային բանկի խումբը կաջակցի Հայաստանում աշխատատեղերի ստեղծմանը և դիմակայունության ամրապնդմանը
Նորություններ
2024 թվականի հունվարի 21-ին Համաշխարհային բանկի խմբի Գործադիր տնօրենների խորհուրդը հաստատեց Հայաստանի համար նախատեսված հնգամյա նոր Երկրի գործընկերության շրջանակը (ԵԳՇ)։
Այս շրջանակի նպատակն է կրճատել աղքատությունը և նպաստել համընդհանուր բարեկեցությանը՝ ստեղծելով ավելի լավ զբաղվածության հնարավորություններ, բարելավելով մարդկային կապիտալի արդյունքները և բարձրացնելով երկրի դիմակայունությունը։
Վերջին տարիներին Հայաստանը զգալի առաջընթաց է գրանցել զարգացման ոլորտում։ Այնուամենայնիվ, ենթակառուցվածքային բացերը, ներքին և օտարերկրյա ներդրումների ցածր մակարդակը, ինչպես նաև գործազրկության բարձր մակարդակը շարունակում են մնալ տնտեսական աճի հիմնական մարտահրավերները։ Կրթության և առողջապահության ոլորտներում անհավասար արդյունքները սահմանափակում են բնակչության զբաղվածության հնարավորություններն ու արտադրողականությունը։ Սոցիալական պաշտպանության համակարգը բարեփոխումների կարիք ունի՝ ճգնաժամերի ընթացքում առավել արդյունավետ կերպով թիրախավորելու և աջակցելու խոցելի խմբերին։ Հայաստանը նաև բախվում է երկրաշարժերի հետ կապված զգալի ռիսկերի և գնալով ավելի խոցելի է դառնում կլիմայի փոփոխության ազդեցությունների նկատմամբ։
Նոր ռազմավարությունն ընդգծում է տնտեսական ցնցումների, փխրունության և հակամարտությունների, բնական աղետների ու կլիմայի փոփոխության նկատմամբ դիմակայունության ամրապնդման անհրաժեշտությունը։ Առաջարկվող ԵԳՇ-ն կաջակցի Հայաստանին հասնելու հետևյալ նպատակներին․
– Ավելի շատ և ավելի որակյալ աշխատատեղեր՝ ապահովելով մասնավոր հատվածի աճի համար առավել բարենպաստ պայմաններ և կրճատելով աշխատուժի հմտությունների անհամապատասխանությունները։
– Ավելի ամուր մարդկային կապիտալ՝ բարելավելով որակյալ առողջապահական ծառայությունների հասանելիությունը և ուժեղացնելով սոցիալական պաշտպանության համակարգը։
– Դիմակայուն տնտեսություն՝ խթանելով կլիմայի փոփոխությանը հարմարվող տնտեսական գործունեությունը և ամրապնդելով պետական և ինստիտուցիոնալ համակարգերը, ներառյալ պետական ֆինանսների կառավարումը, ռազմավարական պլանավորումը և պետական կառավարման բարեփոխումները
https://www.1lurer.am/en/2025/01/22/World-Bank-Group-to-support-job-creation-and-resilience-in-Armenia/1253302
