Նոր էջ հայ-ֆրանսիական տնտեսական համագործակցության մեջ

2025 թվականի մայիսի 26-ին Enterprise Armenia-ն և Business France-ը ստորագրեցին Փոխըմբռնման հուշագիր (MoU)՝ նպատակ ունենալով խորացնել երկկողմ տնտեսական համագործակցությունը և խթանել Հայաստանի ու Ֆրանսիայի միջև նոր ներդրումային հնարավորությունները։

Հուշագիրը ստորագրվել է «Երևանյան երկխոսություն» միջոցառման շրջանակում՝ Enterprise Armenia-ի գլխավոր տնօրենի ժամանակավոր պաշտոնակատար Գոհար Գալյանի և Հայաստանում Ֆրանսիայի Հանրապետության արտակարգ և լիազոր դեսպան Օլիվիե Դըկոտինյիի կողմից։ Ստորագրման արարողությունը տեղի է ունեցել երկու երկրների արտաքին գործերի նախարարների ներկայությամբ, ինչը ևս մեկ անգամ ընդգծում է այս համագործակցության ռազմավարական նշանակությունը Հայաստանի և Ֆրանսիայի համար։

Այս կարևոր քայլը նոր թափ է հաղորդում հայ-ֆրանսիական տնտեսական գործընկերությանը՝ միաժամանակ դիրքավորելով Հայաստանը որպես մրցունակ և վստահելի հարթակ տարածաշրջանում ֆրանսիական ընկերությունների զարգացման և ընդլայնման համար։

Մենք կառուցում ենք կամուրջներ, որոնք միավորում են նորարարությունը, ներդրումները և համատեղ աճը։