Հարավային Ամերիկայում առաջին TUMO կենտրոնը կբացվի 2025 թվականին

TUMO-ի նորարարական թվային կրթության մոդելը շուտով հասանելի կլինի նաև Բուենոս Այրեսի երիտասարդներին։ Հարավային Ամերիկայում առաջին TUMO կենտրոնը կբացվի 2025 թվականի ամռանը՝ տարածաշրջանի ուսանողներին առաջարկելով նոր հնարավորություն զարգացնելու իրենց հմտությունները տեխնոլոգիական և ստեղծարար ոլորտներում։

Այս նախագիծը, որը կարևոր փուլ է TUMO-ի միջազգային ընդլայնման գործում, իրականացվում է TUMO կազմակերպության և Բուենոս Այրեսի կրթության նախարարության համագործակցության շնորհիվ։

Իր հայտարարության մեջ TUMO ստեղծարար տեխնոլոգիաների կենտրոնը հայտնել է, որ Բուենոս Այրեսի քաղաքապետ Խորխե Մակրին, կրթության նախարար Մերսեդես Միգելը, ինչպես նաև TUMO-ի հիմնադիրներ Սեմ և Սիլվա Սիմոնյանները, զարգացման տնօրեն Բեկոր Պապազյանի ներկայությամբ, ստորագրել են համաձայնագիրը, որով պաշտոնապես հաստատվել է TUMO Բուենոս Այրես կենտրոնի ստեղծումը։

TUMO կենտրոնը կգործի Centro Metropolitano de Diseño-ում՝ Բուենոս Այրեսի նորարարական կենտրոններից մեկում։ Ստորագրման արարողությունից առաջ քաղաքապետ Մակրին, TUMO-ի հիմնադիրների ուղեկցությամբ, այցելել է կենտրոնի ապագա տարածքը և քննարկել նախագծի իրականացման տարբեր փուլերը։

Բուենոս Այրեսի TUMO կենտրոնը շուրջ 3 000 երիտասարդի հնարավորություն կտա ստանալ մասնագիտական կրթություն տարբեր ոլորտներում, այդ թվում՝ անիմացիայի, տեսախաղերի ստեղծման, երաժշտության, ռոբոտաշինության, կինոարտադրության, գրաֆիկական դիզայնի, 3D մոդելավորման, ծրագրավորման և բազմաթիվ այլ ուղղություններով։ Այս կրթական միջավայրը երիտասարդներին հնարավորություն կտա զարգացնել այն հմտությունները, որոնք անհրաժեշտ են ապագայի տեխնոլոգիական աշխարհում հաջողության հասնելու համար։

Հոդվածի ամբողջական տարբերակը կարող եք կարդալ հետևյալ հղմամբ․
https://armenpress.am/hy/article/1204229